Дар Бохтар мусобиқаи футболи хурд барои дарёфти Ҷоми Раиси шаҳр оғоз ёфт

Бо ҳадафи тарғиби тарзи ҳаёти солим, таҳкими дӯстиву ҳамбастагӣ ва арҷгузорӣ ба арзишҳои варзишӣ, дар шаҳри Бохтар мусобиқаи футболи хурд барои дарёфти Ҷоми Раиси шаҳр оғоз гардидааст. Ин чорабинии варзишӣ дар доираи таҷлили Рӯзи ҷаҳонии футбол ва бо ибтикор ва дастгирии бевоситаи раиси шаҳри Бохтар муҳтарам Абдулмаҷид Муминзода роҳандозӣ шудааст.

Мусобиқа байни дастаҳои ташкилоту муассисаҳои давлатӣ, хусусӣ ва ҷамъиятии шаҳр сурат гирифта, бо ширкати даҳҳо футболбозон – кормандони фаъоли идораҳо, омӯзгорон, табибон, кормандони бахшҳои гуногуни хоҷагии халқ ва дигар намояндагони ҷомеа ҷараён дорад.

Зимни суханронӣ дар ифтитоҳи мусобиқа, масъулини соҳаи варзиш ва намояндагони мақомоти иҷроияи ҳокимияти давлатии шаҳр зикр намуданд, ки чунин чорабиниҳо на танҳо воситаи тарғиби футбол ва ҷалби мардум ба варзиш мебошанд, балки фазои дӯстона, ҳамбастагӣ ва рақобати солимро миёни кормандони муассисаҳо ба вуҷуд меоранд.

Мусобиқа дар чанд давр сурат гирифта, дастаи ғолиб бо Ҷоми Раиси шаҳри Бохтар, медал ва туҳфаҳои хотиравӣ қадрдонӣ хоҳад шуд. Инчунин, барои беҳтарин бозигар, дарвозабони беҳтарин ва нишонзани мусобиқа ҷоизаҳои махсус пешбинӣ гардидаанд.

Аз ҷониби бахши кор бо ҷавонон ва варзиши шаҳр, шӯъбаи маориф, кумитаи иттифоқҳои касаба ва дигар сохторҳои дахлдор, барои баргузор намудани ин мусобиқаи сатҳи шаҳрӣ тамоми шароит муҳайё карда шудааст.

Мақомоти шаҳрӣ таъкид мекунанд, ки баргузории чунин мусобиқаҳо дар таҳкими робитаҳои байниидоравӣ, солимии ҷисмонӣ ва рӯҳии кормандон ва рушди фарҳанги варзишии ҷомеа нақши муассир мебозанд. Ин иқдоми навбатӣ бозгӯи он аст, ки роҳбарияти шаҳри Бохтар ба рушди варзиш ва дастгирии фаъолияти солими шаҳрвандон таваҷҷуҳи ҷиддӣ зоҳир менамояд.