Имрӯз, 13 март, Маҷлиси вакилони халқи шаҳри Бохтар таҳти раёсати раиси Маҷлиси вакилони халқи шаҳр, раиси шаҳри Бохтар Абдулмаҷид Муминзод бо иштироки вакилони тозаинтихоб баргузор гардид.

Ҷаласаро раиси шаҳр ифтитоҳ намуда, ҳозиринро бо даъвати нави Маҷлиси вакилони халқи шаҳр табрик гуфт ва иброз дошт, ки вакилон ҳамчун намояндагони мардум бояд бо масъулияти баланд фаъолият бурда, барои пешрафти шаҳри Бохтар ва беҳбудии зиндагии сокинон талош варзанд.

Баррасии масъалаҳои муҳими рӯз

Дар ҷаласа нахуст раиси Комиссияи шаҳрии интихобот оид ба натиҷаи баргузории интихоботи вакилони Маҷлиси вакилони халқи шаҳри Бохтар ҳисобот пешниҳод намуд. Тибқи маълумоти ӯ, интихоботи вакилони маҷлис мутобиқ ба талаботи қонунгузории Ҷумҳурии Тоҷикистон баргузор гардида, шахсони арзанда ва боэътимод ба ҳайати Маҷлиси вакилони халқи шаҳр шомил шуданд.

Баъдан, ваколати вакилони тозаинтихоб тасдиқ гардида, ҳайати нави Маҷлиси вакилони халқи шаҳри Бохтар расман ба фаъолият шурӯъ кард.

Ҳамзамон, таркиби Комиссияҳои доимии Маҷлиси вакилони халқи шаҳр муайян ва тасдиқ гардида, раис ва аъзои онҳо интихоб шуданд. Ин комиссияҳо дар самтҳои гуногун фаъолият намуда, масъалаҳои муҳими иҷтимоӣ, иқтисодӣ ва ҳуқуқиро баррасӣ хоҳанд кард.

Дастури Маҷлиси вакилони халқи шаҳр низ мавриди баррасӣ қарор гирифта, барои самаранокии кори Маҷлис тасдиқ шуд.

Таъкиди раиси шаҳр ба масъулияти вакилон

Абдулмаҷид Муминзод дар суханронии худ аз вакилони тозаинтихоб даъват ба амал овард, ки бо садоқат ва масъулият кор кунанд. Ӯ таъкид намуд, ки ҳар вакил бояд пайваста бо мардум дар робита бошад, мушкилоти онҳоро омӯзад ва барои ҳалли онҳо чораҳои зарурӣ андешад.

Раиси шаҳр ҳамчунин ба масъалаҳои рушди шаҳр, ободониву бунёдкорӣ, беҳтар намудани инфрасохтор ва таъмини шароити хуб барои сокинон ишора намуда, нақши вакилонро дар ин раванд муҳим арзёбӣ кард.

Иҷлосияи якуми Маҷлиси вакилони халқи шаҳри Бохтар дар фазои созанда баргузор шуда, барои оғози фаъолияти босамари ҳайати нави вакилон замина гузошт. Вакилони халқ изҳор доштанд, ки дар иҷрои вазифаҳои худ содиқона меҳнат намуда, барои шукуфоии шаҳри Бохтар талош хоҳанд кард.

Маркази матбуоти мақомоти иҷроияи ҳокимияти давлатии шаҳри Бохтар