Паёми табрикии раиси шаҳри Бохтар Исмоилзода А.А ба муносибати иди Қурбон

Дӯстони азиз!

Ҳамдиёрони арҷманд!

Инак, дар фазои сулҳу оштӣ, якдилию иттифоқӣ ва ваҳдати комили кишвар ба диёри биҳиштосоямон иди барои мардуми кишвар мубораку муътабар – Иди Қурбон фаро мерасад. Фарорасии ин иди саидро ба хамаи Шумо - сокинони фараҳманди шаҳри Бохтар муборакбод гуфта, бароятон рӯзгори ободу осуда ва саодату сарбаландӣ орзу менамоям.

Маҳз ҳамдилию ҳамбастагӣ, некию накӯкорӣ, ҳайру саховат, дасти кӯмак дароз намудан ба ятимону барҷомондагон, ҳурмату эҳтироми ҳамдигар, таҳаммулпазирию имондорӣ барин хусусиятҳои неки инсонӣ дар арафаи чунин идҳои диннию миллӣ аз тарафи мардуми шарафманди тоҷик бештар ба роҳмонда мешавад. Иди Қурбонро дар тамоми кишварҳои мусулмонӣ бо арҷгузорӣ ба дини мубини ислом ва шукӯҳу шаҳомати хоса ҷашн мегиранд. Ин нукта дар суханронии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо намояндагони ҷомеаи кишвар ифода ёфта буд.

Ба шарофати соҳибистиқлолии кишвар ва ваҳдати миллӣ имрӯз дар кишвари мо озодона ва дар фазои сулҳу субот ва руҳияи баланд истиқбол гирифтани иду ҷашнҳо ба ҳукми анъана даромадааст.Мардум дар доираи аҳкоми шариат фаризаву воҷиботи диниро озодона адо мекунанд ва арзишҳои инсондӯстонаву хайрхоҳонаи онро гиромӣ медоранд, ки ҳама самараи заҳмату талошҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.

Мардуми шарифи кишвар аз дастовардҳои даврони истиқлолият фараҳманд буда, ба қадри соҳибистиқлолӣ мерасанд ва пайи хифзу таҳкими ин неъмати худодод меҳнати арзандаро ба роҳ мондаанд. Мардуми шаҳри Бохтар низ аз ин бунёдкорию созандагиҳо дар канор набуда, дар рушду пешрафти кишвар саҳми шоиста мегузоранд.

Имрӯз ҳамаи мо дар арафаи таҷлили яке аз пуршукӯҳтарин ҷашнҳои миллӣ – 27 - солагии Истиқлолияти давлатии Ҷумҳурии Тоҷикистон қарор дорем. Ба ин санаи фархунда рост омадани иди саиди Қурбон фоли нек буда, моро водор менамояд, ки арзиши баланд доштани дӯстию бародарӣ ва ваҳдати миллиро амиқтар дарк намоем. Ба қадри заҳмату талошҳои пайвастаи Пешвои муаззами миллат расида, дар ҷавоби ин ғамхориҳо меҳнати созандаву бунёдкоронаро ба роҳ монем. Ба он муваффақ гардем, ки пояи истиқлолияти давлатӣ ва ваҳдати миллии мо устувору шикастнопазир бошад.

Дӯстони азиз!

Мо ҳама шоҳиди онем, ки Пешвои миллат муҳтарам Эмомалӣ Раҳмон дар баромаду мулоқотҳояш бо намояндагони ҷомеаи кишвар оид ба масъалаҳои муҳими рӯз сухан ронда, қайд карданд, ки бо суръати кайҳонӣ тағйир ёфтани ҷаҳон, муборизаи абарқудратҳо барои тақсими неъматҳои моддӣ ва сарватҳои табиӣ бисёр осебпазир гардида, зарари он дар ташаккули дунёи маънавии инсон рӯ ба афзоиш мебошад. Бинобар ин, инсоният бояд дар сари ин масъалаҳо бисёр амиқ андеша намояд, ҷиҳати пешгирӣ кардани ин ҳама харобкориҳо дастҷамъона чораҷӯӣ кунад. Ҳамчунин таъкид гардид, ки ислоҳи вазъи маънавӣ ва иҷтимоие, ки бо сабру таҳаммул, хайру саховат, эҳтирому қадршиносӣ ва саодату оромии руҳ вобастагии бевосита дорад, танҳо дар иду айём маҳдуд нашуда, дар ҳаёти мо бояд ҳамеша вуҷуд дошта бошад. Аз ин хотир хеле хуб мебуд, ки сокинони шаҳри мо низ дар иҷрои ин дастурҳои Пешвои миллат кӯшиш намуда, амалҳои хайру савоб, расонидани кӯмакҳо ба шахсони камбизоат, ятимону маъюбон, танҳою бепарасторонро, на танҳо дар иду ҷашнҳо, балки пайваста анҷом диҳанд.

Айни ҳол метавон аз омодагӣ ба 30 – солагии Истиқлолияти давлатии Ҷумҳурии Тоҷикистон, корҳои ободонию бунёдкорӣ, ҳашарҳои умумишаҳрӣ, бунёди иншоотҳои азим, ташкили корхонаҳои истеҳсолӣ ва нақшагузорӣ гардидани 307 иншооти ҷашнӣ ёдовар гардид. Дар ҳақиқат дар ин росто мардуми сарбаланди шаҳри Бохтар бо дарки масъулияти баланд ҳамарӯз сайъ доранд, ки дар корҳои ҷамъиятӣ, ободонию бунёдкорӣ саҳми арзандаи худро гузоранд. Ин аст, ки омодагӣ ба ин ҷашни давлатӣ муташакилона идома дорад.

Итминон дорам, ки мардуми шаҳри Бохтар минбаъд низ ба корҳои бунёдкорию созандагӣ, таҳкиму пойдории истиқлолияти давлатӣ, ваҳдати миллӣ, сулҳу субот, ватандӯстию инсондӯстӣ, худогоҳию худшиносӣ, ободию шукуфоии кишвари азизамон – Тоҷикистон камари ҳиммат баста, дар баробари ин ҷиҳати анҷом додани амалҳои хайру савоб, некию накукорӣ, гирифтани дасти дармондагон ва дигар корҳои шоиста кӯшиш менамоянд.

Бо ҳамин ниятҳои нек иди Қурбонро барои ҳамаи шумо бори дигар муборакбод гуфта, умедворам, ки он барои боз ҳам густариш ёфтани дӯстию рафоқат, ҳамдилию ҳамбастагӣ, ваҳдату ягонагии тамоми сокинони кишвар мусоидат менамояд.

Идатон муборак ҳамдиёрони азиз!

Ҳеҷ овозе нест
 

Суроғаи мо

вилояти Хатлон

735140  шаҳри Бохтар

  кӯчаи Б. Ғафуров №9

Бинои Мақомоти иҷроияи маҳалии ҳокимияти давлатии  шаҳри Бохтар

 

Мо дар шабакаҳои иҷтимоӣ

facebook.pngmail.ru.pngyoutube.pngvk.png

 

 

Тамос бо мо

Tel: (83222) 2-23-44

Fax: (83222) 2-49-59

Email: kadrho.qurghonteppa@khatlon.tj

Zircon - This is a contributing Drupal Theme
Design by WeebPal.